Þekking og færni starfsmanna skiptir okkur máli
Fræðsla, endurmenntun og reglubundin þjálfun er hluti af daglegum störfum starfsmanna. Skipulögð þjálfun og fræðsla fer fram hjá sjóðnum allt árið um kring. Haldnir eru reglulegir fyrirlestrar með það að markmiði að byggja upp þekkingu og færni starfsmanna, í samræmi við stefnur okkar og gildi. Fræðslustarf sjóðsins skiptist annars vegar í sérhæfða endurmenntun og hins vegar í almenna fræðslu.
Metnaður og vandvirk vinnubrögð skipta okkur máli
Fræðslustundir námu 1225 klukkustundum árið 2023 og jafngildir það því að starfsmenn sjóðsins hafi að meðaltali hlotið 44 klukkustundir í þjálfun á árinu. Um 30% af fræðslustundum ársins eru vegna endurmenntunar, starfs- og síþjálfunar sem starfsmenn þurfa á að halda til að viðhalda réttindum og hæfni til að sinna störfum sínum. Um er að ræða starfsmenn sem eru að viðhalda réttindum í löggiltri endurskoðun, sem viðurkenndir bókarar og að styrkja þekkingargrunn sinn til eigna- og áhættustýringar. Starfsmenn annarra sviða og deilda sækja einnig námskeið og fræðslufundi ásamt því að eiga kost á að stunda lengra háskólanám samhliða starfi sínu.
Sú nýbreytni er í burðarliðnum fyrir starfsfólk að opið verður fyrir símenntun sem sjóðurinn hefur fjárfest í og starfsfólk er hvatt til að nýta sér. Innleiðing og skipulag símenntunarverkefnisins verður að fullu lokið á árinu 2024. Starfsfólk mun þá hafa aðgang að fjölda fyrirlestra og kennsluefni á ýmsum sviðum sem styðja bæði við persónulega færni í starfi og færni og vellíðan í lífi hvers og eins.
Árlegt starfsmannasamtal er hluti af starfsþróun hvers starfsmanns. Samtalið gefur starfsmanni og stjórnanda færi á að ræða verkefni, líðan, vinnuaðstöðu, það sem betur má fara og aðgerðir til úrbóta. Starfsmannasamtalið er jafnframt tæki starfsmanns til að hafa áhrif á eigið starf, hæfni, starfsþróun og fræðslu. Áhersla er lögð á samvinnu og góð samskipti starfsmanna og stjórnenda og hafa starfsmenn ávallt tækifæri til að ræða við stjórnendur utan hefðbundinna starfsmannasamtala.
